نشست:05 جولائی 2010ء

قرار داد نمبر۔85

محرک کانام۔رانا ثناء اللہ خان،  وزیر قانون

"صوبائی اسمبلی پنجاب کا یہ ایوان یکم جولائی 2010 کو داتا کی نگری لاہور میں برصغیر کی عظیم بزرگ ہستی سید علی ہجویری رحمتہ اللہ علیہ المعروف حضرت داتا گنج بخشؒ کے مزار پر ہونے والے خودکش حملوں اور اس کے نتیجے میں ہونے والے جانی نقصان کو بدترین قومی سانحہ قرار دیتا ہے، اس کی شدید ترین الفاظ میں مذمت کرتا ہے اور اس پر اپنے انتہائی رنج و الم کا اظہار کرتا ہے۔ برصغیر میں اسلام کا نور پھیلانے والی اس عظیم ترین شخصیت کے مزار شریف پر ہونے والے اس واقعے سے نہ صرف پاکستان بلکہ تمام عالم اسلام کے مسلمانوں کے جذبات کو ناقابل تلافی ٹھیس پہنچی ہے۔ یہ ایوان اس واقعہ کو اسلام اور وطن عزیز کے خلاف ایک مذموم سازش قرار دیتا ہے اور سمجھتا ہے کہ ان کارروائیوں کے پیچھے پوشیدہ ہاتھ کو بے نقاب کرنا ضروری ہے۔ یہ ایوان زائرین کے قتل عام کو ایسا بدترین المیہ قرار دیتا ہے جس کی پوری انسانی تاریخ میں مثال نہیں ملتی۔ پنجاب اسمبلی کا یہ ایوان ان خودکش حملوں کے نتیجے میں شہید ہونے والے بے گناہ اور معصوم زائرین کے اہل خانہ کے غم میں برابر کا شریک ہے اور اللہ تعالیٰ سے مرحومین کی بلندی درجات کیلئے دُعاگو ہے۔ یہ ایوان جناح ہسپتال اور ہال روڈ پر ہونے والے دہشت گردی کے واقعات کی بھی بھرپور مذمت کرتا ہے اس دہشت گردی کے نتیجہ میں شہید ہونے والے پولیس اہلکاران اور معصوم شہریوں کی شہادت پر دل گرفتہ ہے۔ یہ ایوان ماڈل ٹاؤن اور گڑھی شاہو میں واقع عبادت گاہوں میں ہونے والے دہشت گردی کے واقعات کی بھی پُرزور مذمت کرتا ہے اور یہ عہد کرتا ہے کہ احمدیوں سمیت تمام اقلیتوں کے جان و مال کی حفاظت کیلئے تمام تر وسائل بروئے کار لائے جائیں گے۔ ایوان یہ دُعا بھی کرتا ہے کہ پروردگار ان واقعات میں ملوث افراد کو جلد کیفرکردار تک پہنچائے اور پاکستان کے تمام شہریوں کو ایسی ہمت عطا فرمائے کہ جس سے وہ اِن اسلام دُشمن اور ملک دُشمن عناصر کا جرات سے مقابلہ کر سکیں۔ یہ ایوان اس قرارداد کے ذریعے تمام دہشت گردوں کو یہ پیغام دیتا ہے کہ پوری قوم ان کے مذموم عزائم کے خلاف متحد ہے اور اسلام اور مملکت خداداد پاکستان کی سلامتی اور استحکام کے منافی ان کے ناپاک ارادوں کوناکام بنانے کا عزم کرتا ہے۔"